Oliy harbiy ta'lim muassasalariga tanlov tadbirlari qisqartiriladi. Imtihonlar avgust oyida o‘tkaziladi

Bosh vazirning ijtimoiy rivojlantirish masalalari bo‘yicha o‘rinbosari Behzod Musayev 2020-2021 o‘quv yili uchun oliy harbiy ta'lim muassasalariga qabul jarayonlarida bo‘ladigan o‘zgarishlar haqida ma'lumot berdi.

Unga ko‘ra, oliy harbiy ta'lim muassasalariga tanlov tadbirlari joriy yilda istisno tarzida qisqartirilmoqda.

«Dastlabki tanlash tadbirlari tumanlarning o‘zida iyun-iyul oylarida o‘tkaziladi. Tibbiy ko‘rik jarayonlari ikki marta – tumanda va viloyatda o‘tkaziladi. Harbiy-professional tanlov tadbirlari bekor qilinadi.

Test sinovlari boshqa OTMlar bilan birga avgust oyida o‘tkaziladi», dedi bosh vazir o‘rinbosari.

Shuningdek, bu yil oliy harbiy ta'lim muassasalariga kirish uchun hujjat topshirgan abituriyentlar ham 5ta ta'lim yo‘nalishini tanlashi mumkin bo‘ladi.

Bundan avvalroq, harbiy kasbiy tanlov joriy yilning 1 iyunidan 25 iyunigacha, test imtihonlari esa 5 iyul kuni o‘tkazilishi haqida xabar qilingandi.