2021 yildan davlat organlarida ochiq kodli dasturiy ta'minotlardan foydalanish joriy etiladi

Vazirlar Mahkamasining “Davlat organlari va tashkilotlarida erkin tarqatiladigan, ochiq kodli dasturiy ta'minotlarni joriy qilish chora-tadbirlari to‘g‘risida”gi qarori loyihasi muhokama uchun joylashtirildi.

2021 yil 1 yanvardan davlat organlari va tashkilotlarida erkin tarqatiladigan, ochiq kodli, sertifikatlangan va axborot xavfsizligi talablariga javob beradigan barcha turdagi dasturiy ta'minotlardan foydalanish joriy etiladi.

Davlat va xo‘jalik boshqaruvi organlari, mahalliy davlat hokimiyati organlari va tashkilotlarida erkin tarqatiladigan, ochiq kodli dasturiy ta'minotlarni joriy qilish chora-tadbirlar rejasi tasdiqlanadi.

2021 yil 1 iyuldan davlat organlari va tashkilotlari texnik tartibga solish sohasidagi me'yoriy hujjatlar bilan o‘rnatilgan, axborot xavfsizligi talablariga muvofiq “Kiberxavfsizlik markazi” davlat unitar korxonasi tomonidan sertifikatsiyadan o‘tkazilgan ochiq kodli dasturiy ta'minotlardan majburiy foydalanish belgilanadi.

“Kiberxavfsizlik markazi” DUK sertifikatsiyalangan ochiq kodli dasturiy ta'minotlar Yagona reyestrini shakllantiradi va doimiy ravishda yuritib boradi.

Davlat organlari va tashkilotlari:

chora-tadbirlar rejasida nazarda tutilgan tadbirlarning o‘z vaqtida va sifatli amalga oshirilishini ta'minlaydi;

bajarilgan ishlar bo‘yicha har chorakda O‘zbekiston Respublikasi Axborotlashtirish va telekommunikatsiyalar sohasida nazorat bo‘yicha davlat inspeksiyasiga ma'lumot berib boradi.

Ushbu tadbirlarni amalga oshirish bilan bog‘liq xarajatlar davlat organlari uchun ularning budjetdan tashqari fondlari hisobidan, boshqa tashkilotlar uchun o‘zlarining daromadlari hisobidan ta'minlanishi belgilanadi.

Qarorning bajarilishini nazorat qilish O‘zbekiston Respublikasi Vazirlar Mahkamasining IT-texnologiyalar, telekommunikatsiyalar va innovatsion faoliyatni rivojlantirish masalalari departamenti zimmasiga yuklanadi.