Toshkentdagi uch tumanga yangi rahbarlar tayinlanmoqda. Ortiqxo‘jayevning sobiq va hozirgi o‘rinbosarlari tuman hokimlari bo‘ladi

Manbaning ma'lum qilishicha, yaqin vaqtlar ichida ushbu nomzodlar Toshkent shahri hokimligida o‘tkaziladigan yig‘ilishda lavozimga tasdiqlanadi.

Ma'lum qilinishicha, 2018-2020 yillarda Toshkent shahri hokimining yoshlar siyosati, ijtimoiy rivojlantirish va ma'naviy-ma'rifiy ishlar bo‘yicha o‘rinbosari bo‘lgan, 2020 yil fevralidan buyon Jismoniy tarbiya va sport vaziri o‘rinbosari sifatida faoliyat ko‘rsatib kelgan Elbek Shukurov Sergeli tumani hokimi lavozimiga tayinlanadi.

2018 yil dekabridan buyon Toshkent shahar hokimining uy-joy kommunal xizmat ko‘rsatish bo‘yicha o‘rinbosari lavozimida ishlab kelayotgan Baxtiyor Rahmonqulov Yashnobod tumani hokimi lavozimini egallaydi.

Shuningdek, ko‘p yillardan buyon Sirdaryo viloyati hokimining qurilish ishlari bo‘yicha o‘rinbosari lavozimida ishlab kelgan Jahongir Ibrohimov Bektemir tumanining yangi hokimi bo‘ladi.

Eslatib o‘tamiz, avgust oyi boshida 2019 yil sentyabridan buyon Sergeli tumani hokimi lavozimida ishlab kelgan Baxtiyor Shamuratov lavozimidan ozod etilgandi. 

24 avgust kuni esa Yashnobod tumani hokimi Hojiakbar Tillashayxov hamda Bektemir tumani hokimi Shohrux Mamajonov (ularning ikkisi ham 2018 yil iyul oyidan buyon hokim edi) lavozimlaridan chetlatildi.