Boeing samolyoti Ruminiyada avariyaviy qo‘nishni amalga oshirdi

Afg‘onistondan AQShga maxsus reys bajargan Boeing 767 samolyoti Ruminiya poytaxti yaqinidagi Benyase shahrida joylashgan “Aurel Vlayku” aeroportiga avariyaviy qo‘nishni amalga oshirdi. Samolyot bortida 84 yo‘lovchi bo‘lgan, ularga jabr yetmagan.

Foto: Agerpres

Buxarest aeroportlari milliy kompaniyasi (CNAB) vakili Valentin Iordakening ta'kidlashicha, samolyotning asosiy shassisi tayanchlari shikastlangan. Yo‘lovchilar evakuatsiya qilingan. Voqeaning tergov qilinishi boshlangan.

BoardingPass.ro saytining ma'lum qilishicha, AQShning Omni Air aviakompaniyasiga tegishli bo‘lgan samolyot qo‘nishi vaqtida asosiy shassisining chap tomondagi tayanchlariga shikast yetgan. Shu sababli samolyot uchish-qo‘nish yo‘lagida qolib ketgan. Samolyot Kobuldan uchayotgan bo‘lgan. U Ruminiyadagi aeroportga yonilg‘i to‘ldirish uchun qo‘nib, so‘ngra Vashingtonga uchishi kerak bo‘lgan. Aeroport vaqtincha yopilgan, Benyaseda qo‘nishi kerak bo‘lgan samolyotlar Otopen shahri aeroportiga jo‘natilgan.