Toshkent yer usti halqa metrosining pastki qismida tadbirkorlik faoliyati bilan shug‘ullanish mumkin bo‘ladi

Hozirda ushbu yo‘nalishda joylar tayyorlanmoqda. Bu haqda ommaviy axborot vositalari vakillari uchun tashkil etilgan press-tur davomida ma'lum qilindi.

Yashnobod tumani hokimi Baxtiyor Rahmonqulov mazkur yo‘nalishda tashkil etiladigan tadbirkorlik obektlari haqida gapirib berdi.

«Dunyo tajribasini o‘rganib chiqqanimizda, Berlin, Tokio, Tsyurix kabi shaharlar yer usti metrolarida shunga o‘xshash majmualar yaratilgan. Ya'ni bunday amaliyot bir qator rivojlangan davlatlarda mavjud.

Shundan kelib chiqib, birinchi va ikkinchi bekat oralig‘ida birinchi chorrahadan boshlab 11 kilometrdan ortiq joyni 6ta lotga bo‘lib chiqdik. Natijada tadbirkorlar uchun jami 153 161 kv. metr joy yaratildi», deydi Baxtiyor Rahmonqulov.

Yer qanday ajratiladi?

Vazirlar Mahkamasining 2019 yil 20 dekabrdagi «Tadbirkorlik va shaharsozlik faoliyatini amalga oshirish uchun bo‘sh turgan yer uchastkalarini berish tartib-taomillarini yanada takomillashtirish chora-tadbirlari to‘g‘risida»gi qaroriga asosan, auksion «YeReLeKTRON» avtomatlashtirilgan axborot tizimi orqali amalga oshiriladi.

Loyihaning texnik-iqtisodiy asoslantiruvchi hujjatlari ishlab chiqilganidan so‘ng, o‘rnatilgan tartibda tegishli tashkilotlar bilan kelishilgan holda tasdiqlanadi.

Savdolar ochiq va shaffof tashkil etiladi. Unda har bir tadbirkor ishtirok etishi, o‘z loyihalarini taqdim etishi mumkin.

Qanday tadbirkorlik obektlari ochish mumkin?

Toshkent yer usti halqa metrosining pastki qismida ko‘proq qanday tadbirkorlik obektlari tashkil etilishi tadbirkorlardan kelib tushgan takliflarga bog‘liq bo‘ladi.

«Albatta, yangi metroga mos tarzda zamonaviy tadbirkorlik obektlari tashkil etiladi. Bunda tadbirkorlardan kelib tushadigan takliflar inobatga olinadi. Ular uchun barcha sharoitlarni yaratib beramiz», deydi Yashnobod tumani hokimi.

Savdolar 1 dekabrdan yo‘lga qo‘yilishi kutilmoqda.