Pandemiya davrida Germaniyada millionerlar soni ko‘paydi

Shveytsariyaning Credit Suisse banki bergan ma'lumotga ko‘ra, koronavirus pandemiyasi davrida Germaniyada millionerlar soni o‘sdi. Mamlakatda joriy yilning yanvaridan iyunigacha boyligi bir million dollardan ortiq bo‘lganlar soni 58 mingtaga ko‘paygan. 2020 yil boshida Germaniyada millionerlar soni 2,1 million nafar edi.

Yilning birinchi yarmida nemislar shaxsiy boyligining o‘rtacha ko‘rsatkichi ham oshgan. Har bir katta yoshli germaniyalikning boyligi 1,8 foizga ko‘paygan, yil oxirigacha bu ko‘rsatkich 3,9 foizni tashkil etadi. Hisobot mualliflarining fikricha, bunga pandemiya davrida pul sarflashning cheklanganligi sabab bo‘lgan.

Umuman olganda, Germaniyada badavlat fuqarolar soni nisbatan ko‘pchilikni tashkil etadi. Mamlakat aholisining 40 foizi 100 ming dollardan ortiq mablag‘ga ega. Bu dunyodagi o‘rtacha ko‘rsatkichdan to‘rt baravarga ko‘pdir.