Alibaba’da xodimlar o‘rtasidagi muloqotda lavozimlar nomini aytishdan voz kechildi

Kompaniyada tushuntirilishicha, Alibaba o‘tkazgan tadqiqot xodimlar onlayn muloqotda biror rahbarni ko‘rganda o‘z fikrlarini ochiqchasiga aytmasliklarini va “qog‘ozga o‘rab” gapirishni boshlashlarini ko‘rsatgan. Yangi qoidalarga ko‘ra, xodimlar korporativ messenjerlar, ichki portallar va elektron pochtada biror xodim egallagan lavozim o‘rniga u kompaniyada bajaradigan vazifanigina ko‘rishadi. Misol uchun, endilikda kompaniya ichidagi muloqotda “marketing bo‘yicha direktor” o‘rniga “marketing vazifasini bajaruvchi” deb ko‘rsatiladi.

Kompaniya xodimlari pandemiya vaqtida ko‘proq onlayn gaplashishni boshlashgan. Guruh bo‘lib onlayn muloqot qilish lavozim nomining ko‘rsatilishi o‘zaro muloqotga salbiy ta'sir qilishini ko‘rsatgan. Shuningdek, xodim rahbar bilan bevosita muloqot qilganda, uning tashabbuskorligi susayishi qayd qilingan. 

Shu bilan birga kompaniya ochiqlikka intilmoqda. Ta'kidlanishicha, Alibaba’ning korporativ messenjerida har qanday xodim istalgan darajadagi rahbarga, hattoki kompaniya asoschisi Jyek Ma va bosh direktori Deniyel Chjanga hech ikkilanmasdan qo‘ng‘iroq qilishi yoki yozishi mumkin.