Pashinyan Putindan Armanistonni himoya qilishni so‘radi

Armaniston Bosh vaziri Nikol Pashinyan shanba kuni Rossiya prezidenti Vladimir Putinga Tog‘li Qorabog‘dagi vaziyat haqida batafsil ma'lumot berilgan xat yozdi. Shuningdek, u ikki davlat o‘rtasidagi ittifoqchilik shartnomasini hisobga olgan holda Armaniston xavfsizligini ta'minlash uchun Rossiya qanday yordam berishi mumkinligini so‘ragan.

Foto: Ayk Bagdasaryan/TASS

Bu haqda Armaniston Tashqi ishlar vazirligi matbuot xizmati xabar berdi.

«Jangovar harakatlarning chegaraga yaqinlashib kelayotgani va allaqachon Armaniston Respublikasi hududiga tajovuzlarning boshlanganini hisobga olib, qo‘llab-quvvatlash darajasi va shaklini aniqlash uchun darhol maslahatlashuvlarni boshlashni iltimos qilib Bosh vazir Rossiya prezidentiga murojaat qildi», – deyiladi xabarda.

Ma'lum qilinishicha, ushbu yordam berilishiga huquqiy asos sifatida 1997 yilning 29 avgust kuni imzolangan «Do‘stlik, hamkorlik va ikki tomonlama yordam» to‘g‘risidagi kelishuvning 2-bandi hamda ittifoqchilik munosabati keltirilgan.

Shuningdek, Pashinyan xatda Tog‘li Qorabog‘dagi jangovar harakatlarda qatnashish uchun Yaqin Sharqdan qurollangan xorijiy terrorchilar «tashlanayotgan»ini qo‘shimcha qilgan.

#Armaniston #Tog‘li Qorabog‘ #Putin #Pashinyan

Kun.uz yangiliklarini Google News'da kuzating

+ Obuna bo'lish