Rossiya va Xitoy Oyda stansiya qurish to‘g‘risida kelishuv imzoladi

Rossiya va Xitoy Oyda xalqaro tadqiqot stansiyasini qurishda hamkorlik qilish to‘g‘risida memorandum imzoladi. Bu haqda «Roskosmos» xabar bermoqda.

 Xabarda aytilishicha, memorandum videokonferensiya rejimida «Roskosmos» bosh direktori Dmitriy Rogozin va Xitoy milliy kosmik korporatsiyasi rahbari Chjan Ketszyan tomonidan imzolangan.

Rossiya va Xitoy ushbu loyiha doirasida oy stansiyasini qurish rejasini ishlab chiqadi. Shuningdek, stansiyani qurish loyihasini rejalashtirish, ishlab chiqish, amalga oshirishda yaqindan hamkorlik qiladi.

Fevralda Xitoyning "Tyanven-1" zondi Mars orbitasiga chiqqandi.

Xitoy missiyasining maqsadi – Marsda hayot izlarini topish hamda uning insonlar tomonidan o‘zlashtirilishi uchun imkoniyatlarni o‘rganish. Marsoxod uch oy davomida sayyorani o‘rganadi, suratga oladi va Mars xaritasini tuzishga yordam beradi. 

 Xitoy ilgari ham Marsni zabt etishga urinib ko‘rgandi. 2011 yilda Rossiya bilan hamkorlikda amalga oshirilgan parvoz muvaffaqiyatsiz startdan keyin to‘xtatilgan.