Toshkentda xususiy shifoxonada yuz bergan janjal oqibatida ikki kishiga nisbatan jinoyat ishi qo‘zg‘atildi 

IIV huzuridagi Tergov departamenti xabariga ko‘ra, mazkur holat yuzasidan Olmazor tumani bo‘yicha IIO FMB huzuridagi Tergov bo‘linmasi tomonidan Bahodir U. va Ravshan Q.ga nisbatan Jinoyat kodeksining 277-moddasi 3-qismi “g” bandi (Bezorilik) bilan jinoyat ishi qo‘zg‘atilib, ular protsessual tartibda ushlangan.

Olib borilgan tergov harakatlari davomida, Bahodir U. mazkur shifoxonada davolanayotgani, Ravshan Q. uni ko‘rish maqsadida kelib, shifoxona ichki tartib-qoidalariga ko‘ra mumkin bo‘lmasa-da, bemor xonasiga kirishini talab qilib, qo‘riqchiga qarshilik ko‘rsatgani va bemor xonasiga kirgani, oradan bir soatdan so‘ng Bahodir U. va Ravshan Q. tashqariga chiqib, qo‘riqchiga “qo‘lingdan nima keldi”, deb mazax qilganliklari tufayli janjal kelib chiqqani aniqlandi.

Jinoyat kodeksi normalariga ko‘ra, bu turdagi jinoyatlar uchun 3 yildan 5 yilgacha ozodlikni cheklash yoxud 3 yildan 5 yilgacha ozodlikdan mahrum qilish jazosi tayinlanadi.