Qurolli Kuchlar akademiyasiga yangi boshliq tayinlandi

Polkovnik Shavkat Husanbayevich Mamajonov Qurolli Kuchlar akademiyasi boshlig‘i lavozimini egalladi. Uni ushbu lavozimga tayinlash to‘g‘risida prezidentning tegishli farmoni imzolangan.

Shavkat Mamajonov muqaddam Qurolli Kuchlar Bosh shtabining sobiq boshlig‘i Pavel Ergashevga o‘rinbosar lavozimida ishlagan. Xalqaro harbiy-o‘quv mashg‘ulotlarida vazirlik vakili sifatida ishtirok etgan.

U Qurolli Kuchlar akademiyasi boshlig‘i lavozimida Hamdam Qarshiyev o‘rnini egalladi. Mudofaa vazirining tarbiyaviy va mafkuraviy ishlar bo‘yicha o‘rinbosari hisoblanuvchi Hamdam Aliqulovich Qarshiyev bir vaqtning o‘zida Qurolli Kuchlar akademiyasi boshlig‘i vazifasini ham bajarayotgandi.

Bundan avvalroq Qurolli Kuchlar Bosh shtabi boshlig‘i Pavel Ergashev boshqa lavozimga o‘tkazilib, uning o‘rnini Shuhrat Xolmuhammedov egallagani xabar qilingandi.