«Prokurorlar tashabbusi bilan 57 nafar shaxsga oqlov hukmi chiqarildi» – Nig‘matilla Yo‘ldoshev

«Faoliyatimizning yana bir muhim yo‘nalishi bu prokurorlarimizning sudlardagi ishtiroki bilan bog‘liq. 2020 yilda 119 mingta ishlar ko‘rilishida prokuror ishtiroki ta'minlandi, sudlarning 3 mingdan ortiq noqonuniy qarorlari prokurorlar protestlari asosida qonunlarga moslashtirildi.

Bu jami o‘zgartirilgan va bekor qilingan sud qarorlarining 31 foizini tashkil etadi. Prokurorlar tashabbusi bilan 57 nafar shaxsga oqlov hukmlari chiqarildi», deya Nig‘matilla Yo‘ldoshevning so‘zlarini keltirmoqda Kun.uz muxbiri.

Avvalroq, Oliy sud Jamoatchilik va ommaviy axborot vositalari bilan hamkorlik boshqarmasi 2020 yilda sudlangan shaxslarning 781 nafari oqlangani va reabilitatsiya qilinganini ma'lum qilgandi.

2020 yil 27 iyul kuni bo‘lib o‘tgan brifingda Oliy sud raisining o‘sha paytdagi o‘rinbosari Xolmo‘min Yodgorov oxirgi 3 yilda 2273 shaxs oqlangani, ilgari oqlov degan tushuncha bo‘lmaganini ta'kidlagandi.

2021 yil 16 mart kuni Oliy sud tomonidan o‘tkazilgan matbuot anjumanida 4 yilda 2 ming 770 nafar fuqaroga nisbatan oqlov hukmi chiqarilgani, shuningdek, 3 ming 434 nafar shaxs sud zalidan ozod qilinib, 5 ming 958 nafar fuqaroga nisbatan asossiz qo‘yilgan moddalar ayblovlardan chiqarilgan yoki o‘zgartirilgani aytilgandi.