«Ukraina sharqida tinchlik bo‘lishi 90 foiz bir kishiga bog‘liq» - Vladimir Zelenskiy

Ukraina prezidenti Vladimir Zelenskiy Ukraina sharqidagi vaziyat taqdiri butunlay Rossiya prezidenti Vladimir Putinga bog‘liqligini aytib, uni bu masalada «siyosiy va insoniy iroda» ko‘rsatishga chaqirdi.

Zelenskiy bir yil ichida mamlakat sharqidagi urushni tugatishga oid saylovoldi va'dalari haqidagi savolga quyidagicha javob berdi:

«Albatta, buni juda xohlayman va hamma narsani qilaman. Ammo afsuski, hamma narsa menga bog‘liq emas. Men buni mutlaqo yashirmayman, Donbassning qaytarilishi va Ukrainada tinchlik bo‘lishi 90 foiz bir kishiga bog‘liq. Siz aniq bilishingiz kerakki, u shu bilan yashaydi», dedi Zelenskiy Putinning ismini tilga olmagan holda.

Zelenskiyning aytishicha, tan olishni istamasa-da, Rossiya Donbassdagi nizo tomonlaridan biridir. Shuningdek, u Donbassda yashagani holda o‘zini Rossiya fuqarosi deb hisoblaydiganlar Rossiyaga ko‘chib o‘tishi zarurligini ta'kidladi. 

Avvalroq, Ukraina prezidenti Rossiya tarixi Qrim borasidagi qadamlari va qarorlari uchun yig‘lashini aytib, bu ukrainlar va rossiyaliklar munosabati yomonlashishiga sabab bo‘lgan «ilk gugurt cho‘pi» ekaniga urg‘u bergandi.