Mercedes-Benz’ni bojxona postidan bo‘laklab olib o‘tmoqchi bo‘lgan fuqaro aniqlandi

Farg‘onada fuqaro Mercedes-Benz’ni bojxona postidan bo‘laklab olib o‘tmoqchi bo‘ldi. Bu haqda Davlat bojxona qo‘mitasi xabar qildi.

Avtomobil ehtiyot qismlari importi bilan shug‘ullanuvchi shaxs tomonidan xorijdan olib kelingan 14 turdagi avtomobil ehtiyot qismlari tovarlarini “erkin muomalaga chiqarish” bojxona rejimiga rasmiylashtirish uchun “Qirguli” tashqi iqtisodiy faoliyat bojxona postiga taqdim etilgan.

Yuk kuzatuv hujjatlari va bojxona yuk deklaratsiyasi asosida bojxona ko‘rigidan o‘tkazilganida, umumiy qiymati 237 million so‘mlik 1 dona “Mercedes-Benz W211” rusumli avtotransport vositasi hujjatlarda “avtomobil kuzovi” deb noto‘g‘ri ko‘rsatilgani, shuningdek, 15 turdagi jami 99 dona avtomobil ehtiyot qismlari hujjatlarda ko‘rsatilmagani aniqlandi.

Mazkur holat yuzasidan hozirda bojxona organlari tomonidan tergovga qadar tekshiruv harakatlari olib borilmoqda.

#Mercedes-Benz #Farg‘ona #bojxona