Toshkentda isitish mavsumi 12 oktyabrdan boshlanadi

Poytaxt hokimligi xabari ko‘ra, Toshkent shahridagi markazlashgan issiqlik ta'minotidan foydalanuvchi iste'molchilarni issiqlik bilan ta'minlash maqsadida, 2021 yil 12 oktyabrdan ijtimoiy soha obektlarining isitilishi boshlanadi.

Qayd etilishicha, shunga ko‘ra joriy yil 14 oktyabrdan ko‘p qavatli turar joy binolari muntazam isitishga o‘tkaziladi.

Vazirlar Mahkamasining 2014 yil 15 iyuldagi 194-qarori bilan tasdiqlangan “Ko‘p kvartirali uylarda issiqlik ta'minoti xizmatlari ko‘rsatish qoidalari”ning 13-bandiga muvofiq, xonadonlarni isitish ehtiyojlari uchun issiqlik energiyasini berish davri Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari tomonidan belgilangan muddatlarda boshlanadi va tamomlanadi.

Isitish davri tashqi havoning o‘rtacha sutkalik harorati 8 daraja tselsiydan past bo‘lgan 5 kunlik davr tamom bo‘lgan kundan keyingi kundan boshlanishi, 8 daraja tselsiydan yuqori bo‘lganda esa tamomlanishi kerak.

Barcha iste'molchilar ulanib bo‘lgandan so‘ng, 6-7 kun davomida o‘rnatilgan toraytiruvchi qurilmalarda issiqlik ta'minoti tizimlarining sinovi olib borilishi lozim.