G20 pandemiyadan keyingi tiklanish bo‘yicha choralarni belgilab oldi

“Katta yigirmatalik” davlatlari yetakchilari Rimda 30-31 oktyabrda o‘tgan 16-sammit yakunlariga ko‘ra yakuniy bayonot qabul qildi. G20 unda koronavirus pandemiyasi, iqtisodiy tahdidlar, global isish, noqonuniy migratsiyaga qarshi kurashish choralari bo‘yicha kelishib oldi.

Foto: consilium.europa.eu

Asosiy masalalar orasida emlanganlik haqidagi sertifikatlarga umumiy talablarni ishlab chiqish va pandemiya sharoitida xalqaro safarlarni tiklash bo‘ldi.

Quyida “Katta yigirmatalik” belgilab olgan choralarning asosiylari keltirilgan.

COVID-19 pandemiyasi bo‘yicha

koronavirusga qarshi vaksina va dorilardan barchaning foydalanishini ta'minlash;
xalqaro safarlarda umumiy standartlar, jumladan emlanganlik haqidagi sertifikatlarga talablarni ta'minlash;
2022 yil yarmigacha dunyo aholisining 70 foizini emlash;
pandemiya sharoitida vaksinalar ishlab chiqilishi muddatini 300 kundan 100 kungacha qisqartirish.

Iqtisodiyot bo‘yicha

iqtisodiyotga ta'sir ko‘rsatuvchi global tahdidlarga qarshi kurashish;
transchegaraviy korrupsiya va soliq gavanlariga qarshi kurashish;
pandemiyadan keyin iqtisodiyotni tiklash;
turizmning tez va barqaror tiklanishini tashkillashtirish;
xalqaro safarlarni tiklashga intilish;
Ekologiya bo‘yicha
global isish o‘sishini 1,5 darajada cheklash bo‘yicha choralar qabul qilish;
issiqxona gazlarining atrof-muhitga chiqarilishini qisqartirish.

Energetika bo‘yicha

ishlab chiqaruvchilar va iste'molchilar o‘rtasida muloqotni yo‘lga qo‘yish;
energiya xavfsizligini oshirish imkoniyatlarini o‘rganish.
Migratsiya muammolari bo‘yicha
migrantlarning integratsiyasi uchun choralar ko‘rish;
noqonuniy migrantlar oqimining oldini olish.

“Yigirmatalik” yetakchilari dunyoda iqtisodiy faollik ishonchli sur'atlar bilan tiklanayotganini qayd qilib o‘tishgan. Ular buni emlash sur'atlarining jadallashayotgani va siyosiy qo‘llab-quvvatlash bilan izohlashgan.