Toshkent aeroportida 200dan ortiq yo‘lovchi to‘planib qoldi. Ularning reysi jadvalga kiritilmagan

3 noyabr kuni Islom Karimov nomidagi Toshkent xalqaro aeroportida yo‘lovchilarning norozilik holati aks etgan video tarqaldi. Lavhada bu norozilikka Toshkent–Istanbul reysiga chiptalar sotilgan bo‘lsa-da, reys yo‘qligi sabab bo‘lgani aytiladi.

“Uzbekistan Airports” AJ axborotiga ko‘ra, 3 noyabr kuni Uzbekistan Airways aviakompaniyasining Toshkent–Istanbul yo‘nalishida uchish uchun 200 nafarga yaqin yo‘lovchi aeroportga kelgan, ammo jadvalda ushbu reys bo‘lmagan. Yo‘lovchilarning barchasi jadvalga kiritilmagan reys uchun chiptalar Asia Luxe Travel sayyohlik kompaniyasi tomonidan sotilganini ma’lum qilishgan.

Aeroport xodimlari sayyohlik kompaniyasi va aviakompaniya vakillari bilan bog‘lanib, ularda yo‘lovchilarga reyslar bekor qilingani haqida ma’lumot berishni va bu holatni bartaraf etish choralarini ko‘rishni talab qilgan.

Bayonotda sayyohlik kompaniyasi UzAirways bilan kelishilmagan holda aviachiptalar savdosini tashkil qilgani va reys uchun 200ga yaqin chipta sotilgani aytiladi.

Norozi yo‘lovchilarga suv tarqatilgan va ularni mehmonxonaga jo‘natish uchun transport tashkil qilingan. Ammo yo‘lovchilar bundan bosh tortgani sababli ular uchun Transport vazirligi tomonidan zaxira havo kemasi ajratilib, reysga yo‘lovchilarni ro‘yxatga olish ishlari boshlab yuborilgan.

Uzbekistan Airways mazkur reys uchun 227 nafar yo‘lovchi ro‘yxatdan o‘tganini ma’lum qildi.

Asia Luxe Travel kompaniyasi izohiga ko‘ra, Toshkent–Istanbul reysi ruxsat beruvchi hujjatlarni olishdagi qiyinchiliklar sababli ushlanib qolgan.

Turoperator yo‘lovchilar uchun ichimlik suvi, tushlik va mehmonxonagacha bepul transfer tashkil etilganini ma’lum qildi.

Kompaniyaga ko‘ra, samolyot mahalliy vaqt bilan soat 20:30da parvoz qilgan, reysga ro‘yxatdan o‘tgan barcha yo‘lovchilar uchib ketgan.

“Keltirilgan noqulayliklar uchun samimiy uzr so‘raymiz”, – deyiladi turoperator axborotida.