Qashqadaryodagi fotoradarda qayd etilgan qoidabuzarlik haqidagi xabarnoma boshqa haydovchiga yuborildi

Ijtimoiy tarmoqlarda Qashqadaryo viloyati Chiroqchi tumani hududida o‘rnatilgan fotoradarda qayd etilgan qoidabuzarlik boshqa haydovchiga yuborilgani haqida xabarlar tarqaldi. Viloyat IIB xabar yuzasidan munosabat bildirdi.

Ma'lum qilinishicha, 2021 yil 1 noyabr kuni soat 23:00da Chiroqchi tumani hududida davlat raqami 01 L 215 QB bo‘lgan Equinox mashinasi haydovchisi MJtKning 128-3-moddasi 3-qismida ko‘rsatilgan huquqbuzarlikni sodir etgani holati onlayn tarzda ishlaydigan maxsus avtomatlashtirilgan fotoradar orqali aniqlangan. 

Ushbu holat rasmiylashtirish jarayonida avtomashinaning davlat raqam belgisi 01 L 215 QB deb tasdiqlanishi lozim bo‘lsa-da, texnik xatolik sababli 01 S 215 QB deb noto‘g‘ri tasdiqlangan. Tekshirish jarayonida xatolik aniqlanib, u joyida bartaraf etilgan va huquqbuzarlikni sodir qilgan davlat raqami 01 L 215 QB bo‘lgan Equinox mashinasi haydovchisiga nisbatan MJtKning 128-3-moddasi 3-qismi bilan 2 million 430 ming so‘mlik jarima belgilangan.

«2021 yil 1 noyabr kuni texnik xatolik sababli davlat raqami 01 S 215 QB bo‘lgan Lacetti mashinasiga nisbatan MJtKning 128-3-moddasi 3-qismi bilan rasmiylashtirilgan jarima solish to‘g‘risidagi qaror to‘liq bekor qilingan», deyiladi munosabatda.