Qashqadaryoda 14,4 million so‘mlik pirotexnika vositalari to‘xtatib qolindi

Qashqadaryo viloyati Koson tumanida 14,4 million so‘mlik pirotexnika vositalari to‘xtatib qolingan. Bu haqda viloyat IIB axborot xizmati xabar bermoqda.

Ma'lum qilinishicha, 2021 yil 13 noyabr kuni soat 14:20 larda Qashqadaryo viloyati bojxona boshqarmasi Kontrabandaga qarshi kurashish va bojxona auditi bo‘limi hamda viloyat IIB xodimlari tomonidan olingan ma'lumotlar asosida, Milliy Gvardiya viloyat boshqarmasi xodimlari bilan hamkorlikda Koson tumanida tezkor tadbir o‘tkazilgan.

Tadbir davomida, Koson tumanida joylashgan to‘yxonalardan birining oldida to‘xtab turgan fuqaro N.A. boshqaruvidagi «Damas» mashinasi xolislar ishtirokida ko‘zdan kechirilganda, uning salonida umumiy qiymati 14,4 million so‘mlik 480 qutidan iborat «Treniya» yozuvli noqonuniy pirotexnika vositalari borligi aniqlangan.

Qayd etilishicha, qonunbuzar fuqarodan olib qo‘yilgan pirotexnika, qonuniy qaror qabul qilingunga qadar vaqtinchalik saqlovga olingan.