Hududlarda 115ta kichik sanoat zonalari yangidan tashkil qilinadi

Prezidentning “Hududlarda kichik sanoat zonalarini tashkil qilish va ularni muhandislik-kommunikatsiya infratuzilmasi bilan ta'minlash chora-tadbirlari to‘g‘risida”gi qarori loyihasi e'lon qilindi.

Quyidagilar: hududlarda yangidan tashkil qilinadigan kichik sanoat zonalari ro‘yxati (115ta); mavjud va yangidan tashkil qilinadigan kichik sanoat zonalarining tashqi muhandislik-kommunikatsiya tarmoqlari bilan ta'minlanishi bo‘yicha amalga oshiriladigan chora-tadbirlar manzilli ro‘yxatlari tasdiqlanadi.

Belgilab qo‘yilishicha, yangi tashkil qilinadigan kichik sanoat zonalari bo‘yicha: bosh reja loyihalarini ishlab chiqish, loyiha hujjatlarini ekspertizadan o‘tkazish Qoraqalpog‘iston Respublikasi, viloyatlar va Toshkent shahar mahalliy budjetlari mablag‘lari hisobidan amalga oshiriladi; bosh rejani ishlab chiqish bo‘yicha loyiha tashkiloti tender savdolari orqali aniqlanadi; manzilli ro‘yxatlarga kiritilgan obektlarni moliyalashtirish kichik sanoat zonalari bosh rejalari ishlab chiqilgandan so‘ng ta'minotchi korxonalar tomonidan berilgan texnik shartlar asosida amalga oshiriladi.

Vazirlar Mahkamasiga manzilli ro‘yxatlarga qo‘shimcha loyihalar (obektlar)ni kiritish, shuningdek, mavjud samarasiz loyihalarni chiqarib tashlash bo‘yicha o‘zgartirish va (yoki) qo‘shimchalar kiritish huquqi beriladi.

Moliya vazirligi 2022 yil uchun konsolidatsiyalashgan budjetning jamlanma parametrlarida maxsus iqtisodiy, kichik sanoat hamda yoshlar, sanoat va tadbirkorlik zonalarini yo‘l-transport va muhandislik-kommunikatsiya infratuzilmasi bilan ta'minlash ishlariga 2,0 trln so‘mlik xarajatlarni ko‘zda tutadi.