AQSh modernizatsiya qilingan atom bombasining ilk seriyali nusxasini ishlab chiqardi

Boshqarma bayonotiga ko‘ra, gap B61-12 bombasi haqida bormoqda va u 23 noyabrda ishlab chiqarilgan. Bomba 1968 yilda qurollanishga olingan B61’ning hozirda mavjud bo‘lgan 4 ta modifikatsiyasidan 3 tasining — B61-3, B61-4 va B61 o‘rnini egallaydi. Bombaning modernizatsiya qilinishi evaziga uning yaroqlilik muddati kamida 20 yilga oshgan. B61-12’ning to‘laqonli seriyali ishlab chiqarilishi 2022 yil mayda boshlanishi, barcha zarur yadro jangovar kallaklari ishlab chiqarilishi esa 2026 moliyaviy yilda yakunlanishi rejalashtirilmoqda.

B61-12 bombasi avvalgi modifikatsiyalaridan parashyuti yo‘qligi va dum qismida qo‘llash aniqligini oshiruvchi inersial nishonga olish tizimi borligi bilan farq qiladi. Ma'lumotlarga ko‘ra, bombaning trotil ekvivalentidagi kuchi ham kamayadi. Modernizatsiya natijasida bombaning barcha yadro va noyadro komponentlari yangilangan yoki o‘zgartirilgan.

B61-12’ning ilk sinovi 2015 yil 1 iyulda o‘tkazilgan. O‘shanda amerikalik mutaxassis Gans Kristensen AQSh ilk boshqariluvchi atom aviabombasini ishlab chiqayotganini aytgan.

Avvalroq BMT bosh kotibi Antoniu Guterrish insoniyat yadroviy halokat yoqasida turganini aytgandi. “Butun dunyoda 14 mingga yaqin yadro quroli saqlanmoqda. Insoniyat hamon yadroviy halokatga juda yaqin turibdi”, deb aytgan bosh kotib. U, shuningdek, hozirda o‘zaro ishonch va tinchlikning yangi davrini boshlash uchun yadro qurolini yo‘q qilish fursati kelganini qo‘shimcha qilgan.