NATO Rossiya Ukraina bilan chegaraga qo‘shin joylashtirishda davom etayotganini ta’kidladi

NATO Rossiya Ukraina bilan chegaraga qo‘shimcha qo‘shinlar olib kelmoqda, degan fikrda. Alyans bosh kotibi Yyens Stoltenberg ana shunday fikr bildirdi.

«Kuchlarni ko‘paytirish davom etmoqda. Ularni joylashtirishdan maqsad noaniq, ammo Ukraina bilan chegarada bosqichma-bosqich artilleriya, bo‘linmalar, tanklar borgan sari ko‘paymoqda», — dedi Stoltenberg.

Uning so‘zlariga ko‘ra, NATO Rossiya bilan muloqotga tayyor, ammo Ukraina borasida Rossiya bilan aslo murosa qilmaydi.

«NATO Yevropa mamlakatlarining, bu Ukrainaga ham tegishli, suveren huquqi, o‘z yo‘lini tanlashi borasida Rossiya bilan hech qachon murosaga kelmaydi», — dedi alyans bosh kotibi. 

U NATO a’zolari Rossiyaning xavfsizlik kafolatlari bo‘yicha turlicha qarashlarda ekani to‘g‘risida tarqalgan xabarlarni rad etdi.

«NATO mamlakatlari Rossiyaga nisbatan yagona pozitsiya va yagona yondashuvga ega. U tiyib turish va mudofaaga, bir-birini himoya qilishga asoslangan, ammo muloqot uchun ham ochiqmiz», — dedi Stoltenberg.