2022 yilda Toshkent metropoliteni Rossiyadan yana 14 ta poyezd sotib oladi 

Qayd etilishicha, 2020 yilda Toshkent metropolitenining o‘rtacha kunlik yo‘lovchi tashish hajmi 250-300 ming kishini tashkil etgan bo‘lsa, bugungi kunda bu ko‘rsatkich 380-420 ming yo‘lovchini tashkil etmoqda.

Muammolarni bartaraf etish maqsadida Toshkent metropoliteni tomonidan o‘tgan davr mobaynida bir qator ishlar amalga oshirildi. «Toshkent metropoliteni» davlat unitar korxonasi tomonidan odamlarning to‘planib qolishi oldini olish va yo‘lovchilarga qulaylik yaratish maqsadida 15 ta harakat tarkibi, jumladan, Rossiyaning «Metrovagonmash» korxonasida ishlab chiqarilgan 60 ta zamonaviy vagonlar yetkazib berildi.

Bundan tashqari, eng tig‘iz vaqtlarda poyezdlar orasidagi intervallar «Chilonzor» yo‘nalishida 3 daqiqani, «O‘zbekiston» yo‘nalishida 4 daqiqani va «Yunusobod» yo‘nalishida 7 daqiqani tashkil etmoqda. Bu muammoni hal etish choralari ko‘rilmoqda. Xususan, 2022 yilda yana 14 ta harakat tarkibini xarid qilish rejalashtirilgan.