Nikolay Shirshovning o‘limi sababi ma’lum bo‘ldi

Bugun, 28 dekabr kuni 47 yoshda vafot etgan O‘zbekiston milliy jamoasi sobiq futbolchisi Nikolay Shirshovning o‘limi sababi ma’lum bo‘ldi.

DonDay.ru sayti marhumning hamkasblariga tayanib xabar berishicha, Nikolay Shirshov qon tomirlaridagi trombning bexosdan yorilishi oqibatida vafot etgan.

Nikolay Shirshov so‘nggi yillarda Rostov shahridan 50 kilometr uzoqlikdagi Novoshaxtinsk shahrida yashab, mahalliy jamoada murabbiy sifatida faoliyat yuritgan. 

Ma’lumot uchun, 1974 yil 22 iyun kuni Toshkentda tug‘ilgan Nikolay Shirshov katta futboldagi faoliyatini 1991 yilda SSSR quyi ligasida «Sverdlovets» klubida (Toshkent viloyati) boshlagan. Keyingi 8 mavsumni O‘zbekiston chempionatida o‘tkazgan va «Paxtakor»ning asosiy tarkibida o‘ynagan.

2000 yildan Rossiya chempionatida to‘p sura boshlagan. 2000—2005 yillarda Premer-Ligada «Rosselmash» / «Rostov» sharafini himoya qilgan. Keyin quyi divizionlarda Rostovning SKA (2006—2007), «Bataysk-2007» (2008—2010), «Taganrog» (2010) klublarida ham o‘ynagan. 2011 yilda MITOS safiga o‘tgan va 2013 yilda futbolchilik faoliyatini yakunlagandi.

U 1996 yilning 19 noyabrida BAAga qarshi o‘rtoqlik uchrashuvida  (4:2) milliy jamoada debyut qilgan va 2005 yilga qadar asosiy jamoada 63 o‘yinda ishtirok etib, 13 gol urgan.