Chegaradan noqonuniy olib o‘tilgan qariyb 1 mlrd so‘mlik telefonlar musodara qilindi - DXX

Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan respublikaga tovar-moddiy boyliklarning noqonuniy olib kirilishiga qarshi tezkor tadbir o‘tkazildi.

Tadbir davomida Farg‘ona tumanida istiqomat qiluvchi, 1977 yilda tug‘ilgan fuqaroning o‘zbek-qirg‘iz davlat chegarasi hududida joylashgan yashash xonadoni ko‘zdan kechirilganda, xufiyona joyga yashirib qo‘yilgan va tegishli hujjatlari bo‘lmagan 436 dona “Redmi Note 10s” uyali telefon apparatlari borligi aniqlanib, protsessual tartibda rasmiylashtirib olindi. 

Tergovga qadar tekshiruv davomida fuqaro umumiy qiymati qariyb 935 mln so‘mni tashkil etuvchi mazkur telefon apparatlarini kelgusida sotish maqsadida Qirg‘iziston fuqarosidan olgani ma’lum bo‘lgan.

Hozirda fuqaroga nisbatan Jinoyat kodeksining 182-moddasi bilan jinoyat ishi qo‘zg‘atilib, tergov harakatlari olib borilmoqda, deyiladi Davlat xavfsizlik xizmati xabarida.