Oziq-ovqat mahsulotlari ishlab chiqaruvchilariga subsidiyalar ajratiladi

Vazirlar Mahkamasi “Respublikada oziq-ovqat mahsulotlari ishlab chiqaruvchilarini yanada qo‘llab-quvvatlash to‘g‘risida”gi qarorni qabul qildi.

Prezidentning “Respublika oziq-ovqat sanoatini jadal rivojlantirish hamda aholini sifatli oziq-ovqat mahsulotlari bilan to‘laqonli ta’minlashga doir chora-tadbirlar to‘g‘risida”gi qaroriga muvofiq 20 mlrd so‘m miqdoridagi mablag‘lar Qishloq xo‘jaligini rivojlantirish va oziq-ovqat ta’minoti jamg‘armasiga o‘tkazib beriladi.

Mablag‘lar quyidagi xarajatlarning 50 foizini qoplab berishga sarflanadi:

• oziq-ovqat mahsulotlarini ishlab chiqarish bo‘yicha yangi tashkil etilayotgan istiqbolli loyihalarning texnik-iqtisodiy asoslanishini tayyorlashga, lekin har bir loyiha uchun 100 mln so‘mdan ko‘p bo‘lmagan miqdorda;
• oziq-ovqat mahsulotlarini ishlab chiqarish bo‘yicha yangi tashkil etilayotgan istiqbolli loyihalarning infratuzilmasini yaratishga, lekin har bir loyiha uchun 100 mln so‘mdan ko‘p bo‘lmagan miqdorda;
• oziq-ovqat mahsulotlarini yetishtirish va ularni chuqur qayta ishlash sohasiga xorijiy ekspertlarni jalb qilishga, lekin har bir loyiha uchun 50 mln so‘mdan ko‘p bo‘lmagan miqdorda.

Quyidagilarni nazarda tutuvchi oziq-ovqat mahsulotlari ishlab chiqarish yo‘nalishidagi loyihalarni tashkil etish bilan bog‘liq xarajatlarning bir qismini qoplab berish tartibi to‘g‘risidagi nizom tasdiqlandi:

• oziq-ovqat mahsulotlari ishlab chiqarish yo‘nalishidagi loyihalarni tashkil etish bilan bog‘liq xarajatlarning bir qismini qoplab berishga subsidiyalar ajratishga doir tartib-taomillar;
• tashabbuskorlarning subsidiya ajratish to‘g‘risidagi arizalarini ko‘rib chiqish tartibi va muddatlari;
• tashabbuskorlarga subsidiya ajratishni rad etishning asoslari hamda ularning ariza bilan qayta murojaat qilish yoxud yuqori turuvchi tashkilotga yoki sudga shikoyat qilish huquqi.

Oziq-ovqat mahsulotlari ishlab chiqarish yo‘nalishidagi loyihalarni tashkil etish bilan bog‘liq xarajatlarning bir qismini jamg‘arma hisobidan qoplab berishga subsidiya ajratish Qishloq xo‘jaligi vazirligining qaroriga asosan amalga oshiriladi.