Toshkentda ijara uy topishga qiynalayotgan talabalarga mahalla raislari va profilaktika inspektorlari ko‘maklashadi

Talabalarning doimiy yashash hududidan ta’lim muassasalariga istalgan vaqtda yetib kelishlarini muvofiqlashtirish maqsadida talabalar turar joylarida tyutorlar jamoasidan iborat 24 soatlik navbatchilik tashkil etildi. Bu haqda Oliy va o‘rta maxsus ta’lim vazirligi axborot xizmati Kun.uz'ga xabar qildi.

Foto: Reuters

"Bundan tashqari talabalarni turar joy bilan ta’minlash ishlarini muvofiqlashtirish sektori tomonidan ijara uy topishga qiynalayotgan talabalar muammolarini bartaraf qilish uchun mahalla raislari va IIB profilaktika inspektorlari bilan hamkorlikda ish olib borilmoqda.

Bugungi kunga kelib, hududlardan 36 738 nafar talaba Toshkent shahriga yetib kelgan. Ularning 10 032 nafari oliy ta’lim muassasalaridagi talabalar turar joylariga, 18 204 nafari ijara xonadonlariga, 8 502 nafari yaqin qarindoshlarinikiga joylashgan.

Ma’lumot uchun, 2022 yil 7 fevraldan boshlab barcha ta’lim tashkilotlarida o‘quv jarayoni bosqichma-bosqich an’anaviy shaklga o‘tkazilmoqda.