NYT: Oq uy tuzgan maxsus guruh Rossiya yadro quroli qo‘llagan taqdirda javob qaytarish rejasini ishlab chiqmoqda 

Oq uy Rossiyaning Ukrainaga hujumi ortidan ishchi nomi «Yo‘lbars» bo‘lgan guruh tuzgan, uning a’zolari Rossiya tomonidan ommaviy qirg‘in qurollari (kimyoviy, biologik yoki yadroviy) qo‘llangan taqdirda, AQSh va uning ittifoqchilari beradigan javob rejasini ishlab chiqish bilan shug‘ullanmoqda. Bu haqda The New York Times manbalari xabar tarqatgan.

Shu bilan birga amerikalik rasmiylar Rossiya yadro quroli qo‘llashi ehtimolini yuqori baholamayapti.

«Yo‘lbars» guruhi Ukrainaga yuborilayotgan qurol-yarog‘ karvonlarini to‘xtatish va urushni Moldova hamda Gruziya hududiga yoyish maqsadida Rossiyaning NATO mamlakatlariga bostirib kirishi ssenariylarini ko‘rib chiqmoqda. Bundan tashqari, guruh a’zolari qaysi holatda NATO Ukrainaga qo‘shin yuborishi mumkinligi haqida ham o‘ylamoqda.

«Yo‘lbars» guruhi 28 fevral kuni AQSh prezidenti Jo Baydenning milliy xavfsizlik masalalari bo‘yicha maslahatchisi Jyeyk Sallivanning topshirig‘i bilan tuzilgan. Uning tarkibidan milliy xavfsizlik sohasida faoliyat ko‘rsatuvchi rasmiy shaxslar o‘rin olgan. Ular bir haftada uch marta yopiq uchrashuv o‘tkazishadi.

Oq uyda «Yo‘lbars» bilan birga yana bir guruh mavjud bo‘lib, u Rossiya prezidentining urush boshlash bo‘yicha qarori natijasida AQShning geosiyosiy pozitsiyasini mustahkamlash imkoniyatlarini ko‘rib chiqmoqda.

• 27 fevral kuni RF prezidenti Vladimir Putin tiyib turuvchi kuchlarni maxsus tayyorgarlik rejimiga o‘tkazish bo‘yicha ko‘rsatma bergandi. Putin ushbu qarorni NATOdagi yetakchi davlatlarning yuqori mansabdor shaxslari «Rossiyaga qarshi tajovuzkor bayonotlar yangrashiga yo‘l qo‘yayotgani» bilan izohlagandi.
• 22 mart kuni CNN uchun bergan intervyusida Rossiya prezidenti matbuot kotibi Dmitriy Peskov mamlakat mavjudligiga tahdid yuzaga kelgan taqdirda, Rossiya yadro qurolini ishga solishi mumkinligini istisno etmagandi. Peskov bunga asos Rossiya milliy xavfsizligi konsepsiyasida belgilab qo‘yilganini qayd etgandi.