O‘zbekistonning to‘rt shahrida innovatsion texnopark tashkil etiladi

Vazirlar Mahkamasining “Innovatsion rivojlanish vazirligi huzuridagi innovatsion o‘quv-ishlab chiqarish texnoparklari faoliyatini tashkil etish to‘g‘risida”gi qarori loyihasi e’lon qilindi.

Toshkent shahrida barpo etilgan “INNO” innovatsion o‘quv-ishlab chiqarish texnoparki Namangan, Buxoro, Jizzax va Nukus shaharlarida 2023-2026 yillarda bosqichma-bosqich tashkil etiladi. Bunda, 8 ta startap-akselerator, 4 ta biznes-inkubator, 4 ta ishlab chiqarish maydonlari, 12 ta kovorking markazlari faoliyati yo‘lga qo‘yiladi.

Tashkil etiladigan Texnoparklar mahalliy budjet hamda O‘zbekiston ijtimoiy va ishlab chiqarish infratuzilmasini rivojlantirish dasturi mablag‘lari hisobidan moliyalashtiriladi.

Belgilanishicha:

• texnoparklar rezidentlari innovatsion mahsulotlar ishlab chiqarishni rivojlantirish uchun eng qulay sharoitlarni yaratish maqsadida O‘zbekiston hududi doirasida eksterritoriallik prinsipi asosida joylashtiriladi;
• texnoparklarni qurilish va jihozlash xarajatlari 90 foizi O‘zbekiston ijtimoiy va ishlab chiqarish infratuzilmasini rivojlantirish dasturi, 10 foizi Qoraqalpog‘iston respublika budjeti va tegishli viloyatlar mahalliy budjetining mablag‘lari hisobidan qoplanadi;
• texnoparklarga har yili “Bo‘lajak olim” tanlovi doirasida ajratiladigan mablag‘larning 30 foizdan kam bo‘lmagan miqdori startap loyihalarni e’lon qilish, ko‘rib chiqish, tanlab olish va muvaffaqiyatli loyihalarni moliyalashtirish uchun yo‘naltiriladi.