Xerson oblastining «yangi hukumati» koloniyada isyonning oldi olinganini xabar qildi

Rossiyalik harbiylar Xersondagi koloniyada isyonning oldini olishgan. Bu haqda Rossiya nashrlari Ukrainadagi Xerson oblastining «harbiy-fuqarolik ma’muriyati rahbari o‘rinbosari» deb atayotgan faol Kirill Stremousov xabar qilgan.

Stremousovning ma’lum qilishicha, Ukraina hukumati regiondagi jazoni ijro etish muassasalari tizimi ustidan nazorat qilmoqda. Uning so‘zlariga ko‘ra, go‘yoki Ukraina Xavfsizlik xizmati xodimlari Xersondagi koloniyada provokatsiya uyushtirgan va mahbuslarni kameralardan chiqarib yuborgan. «Ammo vaziyat harbiylar yordamida tinchlantirildi. Hozirda vaziyat nazorat ostida», — degan TASS muxbiri bilan suhbatda Stremousov.

«U yerda (koloniyada) bir kishi halok bo‘lgan. U to‘siq osha qochib ketmoqchi bo‘lgan, uni to‘xtatishgan», — degan agentlik suhbatdoshi. U boshqa tafsilotlarni keltirmagan.