Toshkent viloyatida fuqarolarni xorijga ishga jo‘natishni va’da qilganlar ushlandi

Toshkent viloyatida xorijiy davlatlarga ishga jo‘natishni va’da qilgan firibgarlar aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar bermoqda.

Foto: Iqtisodiy jinoyatlarga qarshi kurashish departamenti

Qayd etilishicha, Bosh prokuratura huzuridagi departamentning Bo‘stonliq tuman bo‘limi tomonidan IIV xodimlari bilan hamkorlikda tezkor tadbir o‘tkazilgan.

Unda, fuqaro S.N. va U.R. boshqa bir fuqaro J.ni tanishlari yordamida 1 200 AQSh dollari evaziga Polsha davlatiga to‘g‘ridan to‘g‘ri ishga yuborishni va’da qilib, shundan 600 AQSh dollarini olgan vaqtida ashyoviy dalillar bilan ushlangan.

Shu kabi, Oqqo‘rg‘on tuman bo‘limi tomonidan fuqarolarning huquq va manfaatlarini himoya qilish yuzasidan tergovga qadar tekshiruv o‘tkazilgan.

Unda, fuqarolar E.N., G.T. va boshqalar fuqarolarning ishonchiga kirib, ularni go‘yoki elchixonalardagi tanishlari yordamida xorijiy davlatlarga ishga jo‘natishni va’da qilib, G.T.ning plastik kartasiga 2021 yil 5 oktyabrdan 2022 yil 25 mayga qadar jami 531,7 mln so‘mni tushirishga erishib, o‘z ehtiyojlari uchun ishlatib yuborgani aniqlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.