Huquq himoyachilari: Rossiya tergov izolyatorlarida ayblanuvchilarni Ukrainadagi urushga yollashmoqda

Rossiyada Ukrainadagi urushda qatnashish uchun tergov izolyatorlarida bo‘lgan gumonlanuvchi va ayblanuvchilarni yollash boshlandi. Bu haqda 17 avgust, chorshanba kuni huquq himoyachisi, «Rus sidyashchaya» jamg‘armasi asoschisi Olga Romanova ma’lum qildi. Uning so‘zlariga ko‘ra, bu shaxslarga nisbatan ochilgan jinoyat ishlari to‘xtatilmoqda. 

Bunday amaliyot mavjudligini «Ostorojno, novosti» nashriga Gulagu.net inson huquqlari loyihasi asoschisi Vladimir Osechkin tasdiqladi. Uning so‘zlariga ko‘ra, loyiha ishonch telefoniga Moskva va Moskva oblasti, Sankt-Peterburg, Ryazan, Tver va Bryanskda shu kabi holatlar haqida ma’lumot kelib tushgan. 

Iyul oyi boshida OAVda Rossiyaning «Vagner» xususiy harbiy kompaniyasi Rossiya koloniyalarida mahbuslarni yollayotgani haqida xabarlar paydo bo‘la boshladi. «Verstka» nashri va «Rus sidyashchaya» jamg‘armasi hisob-kitoblariga ko‘ra, avgust oyi o‘rtalariga kelib, XHK vakillari mamlakatning 13 mintaqasidagi 21 ta koloniyaga tashrif buyurgan. Romanovaning DW’ga xabar berishicha, «Vagner» XHK bilan aloqador deb hisoblanuvchi tadbirkor Yevgeniy Prigojin shaxsan koloniyadagi mahbuslarni yollashga borgan.