Shavkat Mirziyoyev shu hafta Samarqandga boradi

Prezident Shavkat Mirziyoyev shu hafta Samarqandga tashrif buyuradi. Bu haqda prezident matbuot kotibi Sherzod Asadov haftalik an’anaviy brifingda ma’lum qildi.

Foto: Prezident matbuot xizmati

Qayd etilishicha, boshlangan haftada prezidentning ish jadvali juda tig‘iz.

“Bugun davlatimiz rahbari tadbirkorlar bilan ochiq muloqot o‘tkazadi. Shuningdek, Amerika Qo‘shma Shtatlari Kongressi a’zolari Trent Kelli va Derin Laxudni qabul qilish rejalashtirilgan”, dedi prezident matbuot kotibi.

Ta’kidlanishicha, hafta davomida hududlarda amalga oshirilayotgan qurilish ishlari, ijtimoiy-iqtisodiy loyihalar bilan tanishish maqsadida prezidentning Samarqand viloyatiga borishi kutilmoqda.

Bundan tashqari, davlat rahbari hafta davomida mamlakat iqtisodiy va ijtimoiy rivojiga bag‘ishlangan qator yig‘ilish va muhokamalarni o‘tkazadi.