Yaponiya Rossiyaga kimyoviy qurol bilan bog‘liq tovarlar eksportini taqiqladi

Yaponiya okkupatsion hokimiyatlar tomonidan Donbassning «DXR» va «LXR» tuzilmalarida, shuningdek, Ukrainaning Xerson va Zaporijjya oblastlarida Rossiya tarkibiga qo‘shilish bo‘yicha «referendumlar» o‘tkazilishi fonida Rossiyaga qarshi sanksiyalarni kengaytirdi. Yaponiya Iqtisodiyot, savdo va sanoat vazirligining 26 sentabr, dushanba kuni saytida e’lon qilingan bayonotiga ko‘ra, Tokio Rossiyaga kimyoviy qurol ishlab chiqarish bilan bog‘liq tovarlar eksportini taqiqladi.

Bundan tashqari, eksport cheklovlariga duchor bo‘lgan Rossiya kompaniyalarining sanksiyalar ro‘yxatiga yana 20 ta tashkilot kiritildi. Ular orasida, jumladan, «Moselektronproyekt» («Rossiyskaya elektronika» shu’ba korxonasi), «Etalon», «Informakustika» («Rostex» tarkibiga kiruvchi), «Kurchatov instituti» Milliy tadqiqot markazining A.I.Alixonov nomidagi Nazariy va eksperimental fizika instituti va «Salyut» zavodi bor.

Yaponiya Tashqi ishlar vazirligi o‘tgan hafta Moskvani «referendumlar» tufayli Rossiyaga qarshi eksport sanksiyalarini kengaytirish rejalari haqida ogohlantirgan edi. O‘shanda tashqi ishlar vaziri Yoshimasa Xayashi harbiy va mudofaa sohasiga oid kompaniyalar cheklovlarga duchor bo‘lishini e’lon qildi. Bundan avvalroq AQSh va Yevropa ittifoqi «referendumlar» o‘tkazilgan taqdirda yangi sanksiyalar haqida ogohlantirgan edi. 

24 fevralda Rossiyaning Ukrainaga qurolli bostirib kirishi boshlanganidan beri Yaponiya Rossiyaga qarshi bir nechta sanksiyalar paketini joriy qildi. Jazo choralari eksport va import, bank sektori, davlat muassasalari, kompaniyalar va jismoniy shaxslarga ta’sir ko‘rsatdi.