Kiyev kamikadze dronlar hujumiga uchradi

Kiyev markazidagi Shevchenko rayonidagi portlashlar haqida shahar meri Vitaliy Klichko xabar berdi. «Havo trevogasi e’lon qilindi. Boshpanalarda qoling!» deb yozdi u o‘zining telegram-kanalida. 

Ukraina prezidenti ofisi rahbari Andrey Yermak poytaxtga kamikadze dronlar orqali hujum qilinganini ma’lum qildi.

«Rossiyaliklar bu ularga yordam beradi deb o‘ylayapti, ammo bunday harakatlar o‘lim talvasasiga o‘xshaydi. Bizga ko‘proq va imkon qadar tez fursatda havo hujumidan mudofaa tizimlari kerak. Bizda sekin harakatlanishga vaqt yo‘q. Osmonni himoya qilish va dushmanni yo‘q qilish uchun ko‘proq qurol. Shunday ham bo‘ladi», deb yozdi u telegramda. 

Reuters agentligi xabariga ko‘ra, dronlar markaziy temiryo‘l vokzali atrofiga kelib tushgan, bu bir qancha yong‘inlar keltirib chiqargan va turar joylarni shikastlagan.

Klichkoning yozishicha, hujumlar natijasida Kiyevning Shevchenko tumanida turar joy binosida portlash ro‘y bergan. 18 kishi qutqarilgan, ikki kishi halok bo‘lgan. Xarobalar orasidan odamlarni qidirish ishlari olib borilmoqda.

Ukraina prezidenti Volodimir Zelenskiy turar joy binolaridan biri jiddiy shikastlangani aks etgan videoni namoyish etdi. «Tun bo‘yi va tong otganida dushman tinch aholini terror qilishda davom etdi. Butun Ukraina bo‘ylab kamikadze dronlar va raketalar hujum qilmoqda. Kiyevda aholi turar joyiga zarba kelib tushdi», deya yozdi Zelenskiy telegram-kanalida.

Rossiya mudofaa vazirligining o‘tgan kun oxiridagi hisobotida «harbiy boshqaruv obektlari va Ukraina energetika tizimlari»ga zarbalar berilgani ma’lum qilingandi. Bugungi hujumlardan keyin ham vazirlik «Ukraina energetika obektlari va harbiy boshqaruv punktlariga yuqori aniqlikdagi zarbalar» yo‘llanganini ma’lum qildi.

O‘tgan hafta boshida Rossiya Ukrainaning turli hududlari, jumladan Kiyevdagi infratuzilmalarga qanotli raketalar va uchuvchisiz uchar qurilmalar bilan yoppasiga zarbalar bergandi. Keyingi kuni ham zarbalar davom etdi, ammo intensivlik pasaydi, Rossiya raketalar o‘rniga Erondan sotib olingan Shahed-136 rusumli kamikadze dronlar uchira boshladi, Rossiya armiyasida bu qurollarga «Geran-2» nomi berilgan.

Klichko bugun tongda Kiyevda qulagan  shunday dronlardan birining qoldiqlarini namoyish etdi.

Uning ma’lum qilishicha, shu kuni Kiyevga jami 28 ta dron uchirilgan, shundan faqat 5 tasi nishonga yetib borgan, qolganlari urib tushirilgan.

AFP agentligi shaharda pastlab uchayotgan dron va uni urib tushirishga urinayotgan harbiylarning suratlarini namoyish etdi.

Ijtimoiy tarmoqlarda Ukraina poytaxtida yashovchilar, jumladan oddiy fuqarolar ham dronni oddiy qurollar (bir holatda pnevmatik qurol bilan ham) orqali urib tushirishga urinayotgani aks etgan video tarqaldi.

Faqat Kiyev emas

Bir kun oldin Mikolayiv shahri dronlar hujumiga uchragandi. Mahalliy resurslarda katta yong‘in kelib chiqqani aks etgan video namoyish etilgan.

Rossiya ta’siridagi telegram-kanallar esa daryo porti yaqinidagi yonilg‘i saqlanuvchi rezervuarlar yonayotganini yozishdi. Dushanba kuni Mikolayiv meri Oleksandr Senkevich kamikadze dronlar yonilg‘i omboriga emas, portdagi terminallardan biridagi o‘simlik moyi yuklangan sisternalarga hujum qilgani haqida xabar berdi.

17 oktyabr kuni tongida Ukrainaning boshqa hududlari - Sumi va Dnepropetrovsk oblastlariga ham hujumlar amalga oshirilgan. Mahalliy rasmiylarga ko‘ra, infratuzilma obektlariga zarbalar berilgan. Dnepropetrovsk oblasti harbiy ma’muriyati rahbari Valentin Reznichenko hujumda qanotli raketalar va artilleriya snaryadlaridan foydalanilgani, raketalardan biri nishonga kelib tushishi natijasida yong‘in chiqqanini ma’lum qilgan. 

Shuningdek, hafta davomida yana bir bor Zaporijjya shahri bo‘ylab tungi zarbalar amalga oshirildi. Oblast harbiy ma’muriyati rahbari Oleksandr Starux ham dronlar ishtirok etmagan holda raketalar bilan hujum qilingani haqida xabar bergan. Uning yozishicha, dushman o‘z maqsadiga erisha olmagan, shaharda vayrongarchiliklar va jabrlanuvchilar yo‘q.

Volodimir Zelenskiy an’anaviy tungi murojaatida rossiyaliklar zarbalari oqibatida ayrim hududlarda elektr uzatishni cheklashga to‘g‘ri kelayotganini aytib, Ukraina xalqidan elektr energiyasi iste’molini qisqartirishni so‘radi 

«Rossiyaning raketali terrori kuchaygani sababli energetiklar Ukrainaning ayrim shaharlari va rayonlarida tizim barqaror ishlashi uchun elektr uzatishni cheklashga majbur bo‘lmoqda. Lekin tig‘iz vaqtlarda iste’molga oqilona yondashsak bunday barqarorlashtiruvchi o‘chirishlardan voz kechimiz mumkin. Bu bir isonning turmushida arzimas narsa, biroq butun energiya tizimi uchun juda muhim», — degan Ukraina prezidenti.

U imkoniyatga qarab soat 17:00 dan soat 23:00 gacha elektr energiyasi iste’molini kamaytirishga chaqirgan. Dnepropetrovsk oblastida dushanba tongida favqulodda elektr energiyasi uzilishi kuzatila boshladi.

Hozirda Ukraina bo‘ylab 10 foizlik cheklov joriy qilingan. Eng katta cheklov Chernihiv oblastida — 20 foiz. Poytaxt Kiyevda 7 foizlik cheklov amalda.

«Eski moped tovushi»

Kiyevlik Oleg BBC bilan suhbatda 17 oktyabr ham bir hafta oldin bo‘lgani kabi boshlanganini aytadi. U birinchi portlash ovozini Oleg soat 6:40 da temiryo‘l vokzali tomondan eshitadi. Aytishicha, bu bunday ovozlarga ko‘nikib ketgan chaqalog‘ini uyg‘ota olmagan. 10-15 daqiqa o‘tib esa o‘qotar qurol ovozlari eshitila boshlaydi.

«Yana bir yangicha ovoz - eski moped ovozi edi - va biz tushundikki, «Shahid» [Shahed-136] uchun ov ketmoqda. Bola onasi bilan vannaxonaga yugurdi, men esa oynadan qaradim. Chindan ham 100 metr masofadan dron uchib o‘tayotgandi», - deya hikoya qiladi Oleg.

«Ajablanarli, ammo ko‘tarilayotgan quyosh nurlarida u qora emas, balki yorqin sariq rangda edi. Lahza o‘tmay portlash ovozlari yangradi. Uyimdan taxminan 2 km masofada», - deya qo‘shimcha qiladi u.

Uning hisoblariga ko‘ra, Shevchenkovoda yana to‘rt-besh portlash sodir bo‘lgan.

«Soat 6:20 da sirena ovozlari yangray boshladi. Men hali to‘shakda yotgandim va tushuna olmasdim - bu xayolimdami yoki haqiqat. Tezda yostiq va adyolni vannaxonaga olib o‘tdim. Va boshlandi: birinchisi, ikkinchisi, uchinchisi», - deya eslaydi kiyevlik Oksana.

U osmondagi baland va yoqimsiz tovushni tasvirlaydi - bu erta tongda Kiyevga hujum qilgan dronlardan chiqardi. Keyin ularga qarata o‘t ochilgani va kuchli portlash ro‘y bergani ovozlari eshitiladi.

«Vaziyat tahlikali va tushunarsiz edi. Kuchim yo‘q edi. Bu juda qo‘rqinchli», deydi shahar markazida yashovchi Oksana.