Ukrainaning yadro obektlarida «iflos bomba» tayyorlanish belgilari topilmadi

MAGATE Ukrainaning uchta atom elektr stansiyasini tekshirib, «iflos bomba» tayyorlanish belgilarini topmadi.

Foto: EPA

Rossiya rasmiylari Ukrainani past quvvatli «iflos bomba» yadro qurolini yaratayotganlikda ayblaganidan so‘ng, MAGATE Ukrainadagi uchta yadro inshootini tekshirdi. Tekshiruv o‘tkazilgan joylarda yadroviy faollik va materiallar belgisi topilmadi, deyiladi MAGATE bayonotida.

«MAGATE inspektorlari Ukraina hukumati so‘roviga ko‘ra, ushbu mamlakatning uchta joyida tekshiruv o‘tkazdi va deklaratsiya qilinmagan yadroviy faoliyat va materiallar belgisini topmadi», — deyiladi agentlik xabarida.

«Iflos bomba» radiologik qurolning oddiy varianti bo‘lib, uning asosiy zarari portlash tufayli emas, balki radioaktiv moddalarning tarqalishi bilan bog‘liq.

Avvalroq, Rossiya Mudofaa vazirligi Ukrainani «iflos bomba» yaratishga tayyorgarlik ko‘rayotganlikda ayblagan edi. 23 oktyabr kuni Ukraina tashqi ishlar vaziri Dmitriy Kuleba Ukraina ixtiyorida «iflos bomba» yo‘qligini aytdi.