Toshkentda Sharof Rashidovning tashqi siyosiy faoliyatiga bag‘ishlangan fotoko‘rgazma tashkil etildi

 “Sharof Rashidov – siyosatchi va diplomat” deb nomlangan fotoko‘rgazmada sobiq ittifoq davrida O‘zbekistonga qariyb chorak asr rahbarlik qilgan Sharof Rashidovning tashqi siyosiy faoliyati aks etgan. Jumladan, bu yerda davlat arbobining 1950–1983-yillardagi rasmiy va xorij safarlarida olingan noyob hamda kam uchraydigan fotosuratlari namoyish etilgan.

Toshkent shahar hokimligi axborot xizmatining ma’lum qilishicha, fotoko‘rgazmaning ochilish marosimida senatorlar, taniqli olimlar, madaniyat, san’at namoyondalari, ziyolilar va keng jamoatchilik vakillari, shuningdek, Sharof Rashidov bilan hamnafas bo‘lgan, hozir pensiyada bo‘lgan tarixchi olimlar, siyosatshunoslar, faxriy jurnalistlar ishtirok etishgan.

Suratlarning birida Sharaf Rashidovni Kubaning afsonaviy yetakchisi Fidel Kastro bilan ko‘rish mumkin. Fotosurat Kastroning 1963 yil may oyida sobiq ittifoqqa tashrifi chog‘ida olingan.

Fotoko‘rgazmadan Sharof Rashidovning Eron shohi Muhammad Rizo Pahlaviy bilan Toshkentda (1957 yil), Misr prezidenti Jamo Abdunosir Husayn bilan (1958 yil), Vetnam yetakchi Xo Shi Min bilan (1959 yil), Mozambikning ilk prezidenti Samorp Moyzesh Mashel bilan (1981 yil), shuningdek, Afrika va LOtin Amerikasidagi ko‘plab mamlakatlarning liderlari va ushbu mamlakatlarda yashovchi oddiy odamlar bilan birga tushgan suratlari ham o‘rin olgan.