O‘zbekiston | 17:19 / 07.12.2022
12988
2 daqiqa o‘qiladi

Qashqadaryoda tuman IIB boshlig‘i o‘rinbosari qo‘l ostidagi xodimga bosim o‘tkazgani yuzasidan xizmat tekshiruvi tayinlandi

Yakkabog‘ tumani IIB boshlig‘i 1-o‘rinbosari Ahror Yangiyev tuman IIB HPB profilaktika inspektori kapitan N.Samandarovga topshiriqni bajarmagani uchun uyga borishini taqiqlagan.

Foto: Videodan kadr

Ijtimoiy tarmoqlarda Yakkabog‘ tumani IIB boshlig‘i o‘rinbosari Ahror Yangiyev qo‘l ostidagi xodimga bosim o‘tkazgani tasvirlangan video tarqaldi. Videoda boshliq o‘rinbosari profilaktika inspektoriga berilgan topshiriqni bajarmagani uchun uyga borishini taqiqlaydi.

Inspektor esa bolalari yolg‘iz qolganini, uyga borishi kerakligini aytadi. A.Yangiyev «Bugun uyga borishga haqqing yo‘q. Bugun ertalabgacha yurishga haqqing bor» deb inspektorga bosim o‘tkazadi.

Viloyat IIb axborot xizmatining xabar berishicha, videotasvirdagi holatda 2022 yil 17 noyabr kuni Yakkabog‘ tumanida sodir bo‘lgan YTH bo‘yicha olib borilayotgan surishtiruv jarayoni aks etgan.

Tuman IIB boshlig‘i 1-o‘rinbosari podpolkovnik A.Yangiyev tuman IIB HPB profilaktika inspektori kapitan N.Samandarovga topshiriq berayotganida profilaktika inspektori rahbari bilan gap talashgan.

Qayd etilishicha, hozirda holat yuzasidan viloyat IIB tomonidan xizmat tekshiruvi o‘tkazilmoqda.

Ғайрат Йўлдошев
Tayyorlagan Ғайрат Йўлдошев
Kun.uz yangiliklarini Google News'da kuzating
+ Obuna bo'lish

Mavzuga oid