Ukraina Polshadan Starlink'ning yangi partiyasini oldi

Starlink sun’iy yo‘ldosh tizimi terminallarining yangi partiyasi Ukrainaga Polshadan yetib keldi, deb ma’lum qildi mamlakat raqamli transformatsiyalar vaziri Mixaylo Fedorov.

Foto: Getty Images

Terminallar allaqachon mamlakat bo‘ylab issiqlik punktlariga jo‘natilgan, ba’zilari esa energetika va tibbiyot sohalarini qo‘llab-quvvatlash uchun berilgan, deya qo‘shimcha qildi u.

«Bu Polshadan Starlink qurilmalarining uchinchi partiyasidir. Oldingilari bilan birgalikda - bu 20 mingga yaqin terminal», - dedi vazir.

Bundan oldin SpaceX hozirda Eron ustida 100 ga yaqin faol Starlink sun’iy yo‘ldoshlariga ega ekani, ular mamlakatni internet bilan ta’minlayotgani aytilgandi.

Starlink — global sun’iy yo‘ldosh tizimi bo‘lib, ishonchsiz, qimmat yoki umuman aloqa yo‘q joylarda yuqori tezlikdagi keng polosali internetni taklif etish uchun SpaceX kompaniyasi tomonidan tashkil qilingan.

Hozirgi vaqtda Yer orbitasida joylashgan 3200 dan ortiq SpaceX Starlink sun’iy yo‘ldoshlari dunyoning eng chekka burchaklariga yuqori tezlikdagi va keng polosali internetni taqdim etadi.

SpaceX Yer orbitasida 12 mingta sun’iy yo‘ldosh tarmog‘ini qurishni maqsad qilgan. Loyihani 2027 yilda yakunlash rejalashtirilgan.