Qashqadaryoda “Yoshlar-kelajagimiz” jamg‘armasi viloyat filiali sobiq boshlig‘i qamoqqa olindi

“Yoshlar-kelajagimiz” jamg‘armasi Qashqadaryo viloyati filiali sobiq boshlig‘i MChJlardan birining rahbari bilan til biriktirib, jamg‘armaning 1,8 mlrd so‘m pullarini talon-toroj qilgan. Bu haqda viloyat prokuraturasi xabar bermoqda.

Ma’lum qilinishicha, “Yoshlar-kelajagimiz” jamg‘armasi viloyat filialining sobiq boshlig‘i Qarshi shahrida faoliyat ko‘rsatuvchi MChJ rahbari bilan jinoiy til biriktirib, o‘ziga ishonib topshirilgan va ixtiyorida bo‘lgan 1,8 mlrd so‘m pullarni o‘zlashtirish va rastrata qilish yo‘li bilan talon-toroj qilgan.

Mazkur holat yuzasidan Qarshi shahar prokuraturasi tomonidan Jinoyat kodeksining 167- va 209-moddalari bilan jinoyat ishi qo‘zg‘atilib, dastlabki tergov harakatlari olib borilmoqda.

Qayd etilishicha, dastlabki tergov davomida 2 nafar shaxsga nisbatan qamoqqa olish tarzidagi ehtiyot chorasi qo‘llangan. Tergovning borishi viloyat prokuraturasi tomonidan alohida nazoratga olingan.