Bo‘stonliqda «Chimyon» dam olish maskaniga olib boruvchi yo‘lda ko‘chki sodir bo‘ldi

Toshkent viloyatining Bo‘stonliq tumani hududidan o‘tgan yo‘lda ko‘chki sodir bo‘ldi. Bu haqda IIV Jamoat xavfsizligi departamenti Yo‘l harakati xavfsizligi xizmati xabar qilmoqda.

Qayd etilishicha, 4R6 Toshkent-Qibray-Chirchiq-Chimyon avtomobil yo‘lining 59-60 kilometrlari oralig‘ida, «Chimyon» dam olish maskaniga olib boruvchi yo‘lda loy ko‘chkisi sodir bo‘lgan.

Ma’lum qilinishicha, hodisa oqibatida hech kimga tan jarohati yetmagan. Qisqa vaqt ichida avtomobil yo‘li to‘liq tozalanib, transport vositalarining harakatlanishiga ruxsat berilgan.

Yo‘l harakati xavfsizligi xizmati noqulay ob-havo sharoitida barcha harakat qatnashchilaridan ehtiyotkor bo‘lishni so‘ragan.