Portugaliyada minglab bolalarning zo‘rlanishi bilan bog‘liq mojaro avj olyapti

So‘nggi 70 yil ichida Portugaliyadagi katolik cherkov muassasalarida 4800 dan ortiq bola jinsiy zo‘ravonlik qurboni bo‘lgan. Bu 13 fevral, dushanba kuni Lissabonda bo‘lib o‘tgan matbuot anjumanida hisoboti taqdim etilgan bolalar psixiatri Pedro Shtrext boshchiligidagi mustaqil komissiya ishining natijasidir, deb yozadi KNA.

Komissiya rahbarining ta’kidlashicha, olingan ma’lumotlar «eng kichik ko‘rsatkich» bo‘lib, jinoyat qurbonlarining aniq sonini sanab bo‘lmaydi. Qurbonlarning aksariyati qayta-qayta tahqirlangan va jinoyatlar asosan katolik seminariyalari, mehribonlik uylari, maktablar va sport inshootlarida sodir etilgan.

70 foizdan ortig‘ida jinoyatlar ruhoniylar tomonidan sodir etilgan. Komissiya guvohlar va jabrlanuvchilarning 500 dan ortiq ko‘rsatmalarini hujjatlashtirdi. Biroq atigi 25 ta ish prokuraturaga o‘tkazilgan bo‘lsa, qolgan jinoyatlar bo‘yicha da’vo muddati o‘tgan. Shunga qaramay, Shtrext kelgusi haftalarda isbotlangan ayblovlarga qaramay, mamlakat cherkovlarida xizmat qilishda davom etayotgan ruhoniylar ro‘yxati paydo bo‘lishini e’lon qildi.

Germaniyada ham so‘nggi yillarda bir qancha komissiyalar katolik muassasalarda bolalar bilan bog‘liq zo‘ravonlik holatlarini tekshirgan. Bu Kyolnda o‘ziga xos janjalni keltirib chiqardi, u yerda 2020 yilda arxiyepiskopiya rahbariyati ushbu mavzu bo‘yicha cherkovning o‘zi topshirgan, yuridik firmalardan birining mutaxassislari tomonidan tayyorlangan hisobotni nashr etishdan bosh tortdi. Bu Germaniyaning ushbu mintaqasida katolik cherkovdan odamlarning ommaviy chiqib ketishiga olib keldi.