Imtihonda qo‘lga tushgan abituriyentlar kirish imtihonlaridan 5-7 yilgacha chetlashtirilishi rad etildi

27 mart kuni AOKAda Bilim va malakalarni baholash agentligi rahbari va mutasaddilari ishtirokida bo‘lib o‘tgan matbuot anjumanida imtihonda taqiqlangan vositalardan foydalangan abituriyentni 5-7 yilga imtihondan chetlashtirish tartibi amal qilishi mumkin yoki yo‘qligi masalasi ko‘tarildi. 

Agentlik rahbari Majid Karimovning ma’lum qilishicha, bu taklif Adliya vazirligi tomonidan ma’qullanmagan.

“Vazirlikka hujjatlar taqdim etilgandi. Bu Adliya vazirligi tomonidan “inson huquqlariga to‘g‘ri kelmaydi” degan vaj bilan to‘xtatildi. Biz ularga e’tiroz bildirolmaymiz. Lekin jahon tajribasida bu narsa mavjud”, – dedi Karimov.

Ma’lumot uchun, Majid Karimov 2022 yil OAV vakillari bilan uchrashuvda tartibni buzgan abituriyentlar 5-7 yilgacha umuman qabul imtihonida ishtirok etmasligi, agar OTMda o‘qisa, talabalikdan chetlashtirish masalasini normativ-huquqiy jihatdan qonuniylashtirish yo‘llari ko‘rib chiqilayotganini ham ma’lum qilgandi.