Rossiyalik milliarderlar Italiya sudiga mulkni xatlash qaroriga qarshi shikoyat beradi

Rossiyalik o‘n nafar tadbirkor Yevropa Ittifoqi sanksiyalarini amalga oshirish doirasida Italiyadagi mol-mulkini musodara qilish qarori bo‘yicha Latsio hududiy ma’muriy sudiga apellyatsiya arizasi bilan murojaat qildi. Bu haqda 26 mart, yakshanba kuni Italiyaning Corriere della sera nashri o‘z manbalariga tayanib xabar berdi.

Italiyada jami 2,7 milliard yevro miqdoridagi sanksiyalar ostida Rossiyaning 28 fuqarosining turli aktivlari bloklandi, deb yozadi gazeta. Latsioda sudga da’vo kiritgan ishbilarmonlar, asosan, xatlovga olingan aktivlarning ular bilan isbotlanmagan aloqasi borligini ta’kidlayapti.

Gazeta manbalariga ko‘ra, sud Britaniya Virjiniya orollarida ro‘yxatdan o‘tgan Asmare kompaniyasining Lady M yaxtasini musodara qilish haqidagi arizasini allaqachon rad etgan. Kema, huquqni muhofaza qilish organlari va Yevropa rasmiylariga ko‘ra, aslida "Severstal" direktorlar kengashi raisi Aleksey Mordashovga tegishli.

Italiya moliya politsiyasi yaxtaga egalik qilish zanjirini kuzatib, ofshor kompaniyalar Mordashovning rafiqasi nomiga ro‘yxatdan o‘tgan degan xulosaga keldi, deb yozadi Corriere della sera. «Yaxta haqiqatan ham Mordashovga tegishli ekanligi aniq, hatto mulk uning rafiqasi Marinaga ro‘yxatdan o‘tgan bo‘lsa ham», — dedi politsiya vakili nashrga.