Zelenskiy: YeKPA rezolyutsiyasi Rossiyani Ukrainadagi jinoyatlar uchun jazolashga yordam beradi

Yevropa Kengashi Parlament assambleyasining (YeKPA) Strasburgdagi sessiyasida Rossiya tomonidan ukrainalik bolalarni deportatsiya qilishda genotsid alomatlari borligini belgilovchi rezolyutsiyaning qabul qilinishi Rossiya va uning prezidentini Ukrainadagi jinoyatlar uchun jazolashga yordam beradigan “muhim siyosiy natija”dir. Bu haqda Ukraina prezidenti Volodimir Zelenskiy 27 aprel, payshanba kuni an’anaviy kechki videomurojaatida aytib o‘tdi.

"Bu bizning qit’amizdagi davlatlarni birlashtirgan bunday yuksak xalqaro tashkilot darajasida ushbu faktning birinchi marta e’tirof etilishidir. Amaliy nuqtayi nazardan, bu qaror Rossiya va uning rasmiylarini, jumladan, davlat rahbarini aynan genotsid, Ukrainaga qarshi genotsid siyosati uchun javobgarlikka tortish bo‘yicha global ishimizga sezilarli yordam beradi", dedi u.

Zelenskiyning so‘zlariga ko‘ra, ukrainalik bolalar deportatsiyasi Rossiyaning Ukraina xalqining o‘ziga xosligini yo‘q qilishga, ukrainaliklar mohiyatini yo‘q qilishga urinishining “yaxshi o‘ylangan” elementlaridan biridir. "Bu Rossiya rasmiylari tomonidan qasddan sodir etilgan genotsid jinoyati - buni siyosiy va huquqiy jihatdan mana shunday kvalifikatsiya qilish kerak", dedi davlat rahbari.