Rossiyada kremlparast yozuvchi Zaxar Prilepin avtomobili portlashi oqibatida jarohat oldi

Nijniy Novgorod yaqinidagi Pionerskoye qishlog‘i yonida kremlparast yozuvchi Zaxar Prilepinning Audi Q7 avtomobili portlab ketdi, deb xabar bermoqda 6 may, shanba kuni Telegram’dagi bir qancha rus tilidagi kanallar, jumladan, «112» va Mash. Portlash natijasida Prilepin yaralandi, uning haydovchisi halok bo‘ldi, deb xabar qildi RIA «Novosti».

Ayni paytda yozuvchining matbuot xizmati u bilan «hammasi joyida»ligini aytdi. «Nima sodir bo‘lganligi hozircha aniqlanmagan. Zaxar Prilepin yaxshi», - deya Prilepin matbuot kotibining so‘zlaridan iqtibos keltirgan TASS axborot agentligi. «Nijniy Novgorodda yozuvchi Zaxar Prilepinning mashinasi portlatilgan. U omon qolgan, ammo yaralangan, hushi joyida», - deya favqulodda xizmatlardagi suhbatdoshidan iqtibos keltirgan agentlik. Dastlabki ma’lumotlarga ko‘ra, avtomobil tagiga portlovchi moslama o‘rnatilgan.

Avvalroq «VChK-OGPU» Telegram-kanali yozuvchi jiddiy jarohat olgani haqida xabar bergan edi.

RBK gazetasi manbasiga ko‘ra, Prilepin Donbassga tashrifidan so‘ng Moskvaga qaytayotgan bo‘lgan. U chegara hududidagi nazorat-o‘tkazish punktini kesib o‘tgan. Yo‘lda Prilepin Nijniy Novgorod viloyatida ovqatlanish uchun to‘xtab o‘tgan. Nashrning ta’kidlashicha, u mashinaga qaytib kelganidan keyin portlash sodir bo‘lgan. 

Ma’lum qilinishicha, Nijniy Novgorodda Zaxar Prilepin mashinasi portlagandan so‘ng, hozirda nazorat-o‘tkazish punktlari o‘rnatilmoqda. 

Baza Telegram-kanali xabariga ko‘ra, Prilepinning qizi portlashdan bir necha daqiqa oldin mashinadan tushgan. Portlash vaqtida u mashinadan yuz metr narida bo‘lgan.