London Ukraina Storm Shadow raketalaridan foydalanganini tasdiqladi

Buyuk Britaniya Ukrainaning London Kiyevga topshirgan uzoq masofali Storm Shadow raketalaridan foydalanganidan xabardor. Bu haqda Londonda Buyuk Britaniya mudofaa vaziri Ben Uolles norvegiyalik hamkasbi Born Arild Gram bilan qo‘shma matbuot anjumanida aytib o‘tdi.

Foto: skynews

"Faqat aytishim mumkinki, ular Ukrainaga jo‘natilayotgani haqida e’lon qilganimizdan keyin ham foydalanishda bo‘lgan, mening ma’lumotlarimga ko‘ra, ular avvalroq qo‘llanilgan. Lekin tafsilotlarni keltira olmayman", - dedi Uolles.

Uning so‘zlariga ko‘ra, "jangovar qiruvchi samolyotlar kabi uzoqroq masofadagi nishonlar vayron bo‘lishini ta’minlaydigan" Storm Shadow raketalari Ukrainaga hali taqdim etilmagan zamonaviy samolyotlarning yetishmasligini qisman qoplash imkonini beradi.

"Biz jangovar qiruvchilar bilan ta’minlay olmaymiz, ammo jangovar qiruvchi samolyotlar qila oladigan narsalardan biri - qo‘shimcha zarba beruvchi texnika yetkazib berishda yordam bera olamiz", dedi Britaniya Mudofaa vazirligi rahbari.

Britaniya Ukrainaga yuzlab zenit raketalari va jangovar uchuvchisiz uchoqlarni topshirish niyatida. Bu haqda Volodimir Zelenskiyning Londonga tashrifi munosabati bilan 15 may kuni Britaniya hukumati ma’lum qildi.

Bundan tashqari, joriy yilning yozida Buyuk Britaniya ukrainalik uchuvchilarni F-16 qiruvchi samolyotlarini boshqarish bo‘yicha tayyorgarlikdan o‘tkazishni boshlaydi, deyiladi Britaniya hukumati saytida. Ukrainaliklar uchun Qirollik harbiy-havo kuchlari uchuvchilari o‘qiydigan dastur moslashtirilmoqda.