1 iyuldan davlat organlari AKT xodimlarining malakasini oshirish yo‘lga qo‘yiladi

2023 yil 1 iyuldan davlat organlarining AKT sohasiga mas’ul xodimlarining 3 yilda bir marta malakasini oshirish yo‘lga qo‘yiladi. 

Respublika va mahalliy ijro etuvchi hokimiyat organlarining AKTni rivojlantirish uchun  mas’ul xodimlari malakasini oshirish va reyting baholashni  tashkil etish chora-tadbirlari to‘g‘risidagi hukumat qaroriga ko‘ra, 2023 yil 1 iyuldan davlat organlarining AKT sohasiga mas’ul xodimlari 3 yilda bir marta malakasini oshiradi.

Mazkur xodimlarning malakasini oshirishga Raqamli texnologiyalar vazirligi mas’ul hisoblanadi.

Malaka oshirish kursi 24 soatdan kam bo‘lmasligi lozim, kursni tamomlagan xodimlar ikki oyda reyting baholashdan o‘tkaziladi.

Malaka oshirish bilan bog‘liq barcha xarajatlar ularni yuborgan davlat organlarining mablag‘lari hisobidan qoplanadi.