Rossiya hukumati Britaniya diplomatlarining RFda harakatlanishini chekladi

Buyuk Britaniyaning Moskva va Yekaterinburgdagi diplomatik missiyalari oddiy xodimlari safardan besh ish kuni oldin Rossiya hukumatini «120 kilometrlik erkin harakatlanish zonasidan tashqariga» chiqib ketishi haqida xabardor qilishi shart, deya xabar berdi Rossiya TIV.

Moskvadagi Britaniya elchixonasi / AGN "Moscow"/Sergey Vedyashkin

Xabarnomalarda sayohat vaqti, maqsadi, turi va marshruti, mo‘ljallangan ish aloqalari, hamrohlik qiluvchi shaxslar, transport turi, tashrif joylari va turar joy kabi ma’lumotlar bo‘lishi kerak.

Cheklovlar diplomatik vakolatxonalarning yuqori martabali xodimlariga taalluqli emas: elchi, vakil-maslahatchi va Moskvadagi konsullik bo‘limi boshlig‘i, shuningdek, Yekaterinburgdagi bosh konsulga cheklovlar amal qilmaydi.

Vazirlik Britaniya diplomatik vakolatxonalari xodimlarining harakatlanishi to‘g‘risidagi xabar berish tartibini «Londonning dushmanlik harakatlariga, jumladan, Buyuk Britaniyadagi Rossiya xorijiy vakolatxonalarining normal faoliyatiga to‘sqinlik qilayotgan harakatlariga javob» deb atadi.

Rossiya Tashqi ishlar vazirligiga chaqirilgan Britaniyaning Rossiyadagi muvaqqat ishlar vakili Tom Doddga «Kiyev rejimining terrorchilik harakatlarini qo‘llab-quvvatlashga yo‘l qo‘yib bo‘lmasligi aytilgan».

Rossiya vazirligi aynan nimani nazarda tutayotganiga aniqlik kiritilmagan.