Ukraina Qora dengizdagi platformalarini qaytardi, Ruminiya chegarada bombapanagoh qurmoqda. Urush suratlari

Ukrainada urushning 566-kuni o‘tdi. Asosiy ma’lumotlar:

Volodimir Zelenskiyning ofisidagilar Ukraina Konstantinovkaning 6 sentabr kungi o‘qqa tutilishini tekshirmasligini ma’lum qildi: Kiyev uchun «barchasi ayon» — bu «Rossiya Federatsiyasining navbatdagi raketa zarbalaridan biri edi».
Yevrokomissiya sanksiyalar doirasida Rossiyadan shaxsiy buyumlarni olib kirish bo‘yicha pozitsiyasini yumshatdi. Idora endi shaxsiy maqsaddagi kiyim va kosmetika mahsulotlari olib o‘tilishini cheklamaydi — va bojxona organlarini avtomobillarni tekshirishga jiddiy e’tibor qaratishga chaqiradi.
Litva, Latviya va Estoniya o‘z chegaralaridan Rossiya raqamlari o‘rnatilgan avtomobillarni o‘tkazishni to‘xtatdi.
KXDR rahbari Kim Chen In zirhlangan poyezdda Rossiyaga keldi. U Putin bilan muzokaralar o‘tkazmoqda. Uchrashuvdagi asosiy mavzulardan biri, katta ehtimol bilan RFga qurol yetkazib berish masalasi bo‘ladi.
Ukrainadagi «Antonov» samolyotlari ishlab chiqaruvchisi dronlar tayyorlashni boshladi.
Ruminiya hududida rossiyaliklar droni qoldiqlari topilganidan keyin mamlakat hukumati chegaradagi hududlar aholisi foydalanishi uchun ikkita beton bombapanagoh qurishni boshladi.
Ukrainalik uchuvchilar tez orada F-16 qiruvchilarida uchishni o‘rganish uchun AQShga yetib boradi va ularning tayyorgarlik jarayoni mahorat darajasiga qarab uch oydan to‘qqiz oygacha davom etishi mumkin, deb xabar berdi jurnalistlarga AQSh Milliy gvardiyasi Harbiy-havo kuchlari rahbari Maykl Lo.
Ukraina «Boyko minoralari» — Qora dengizdagi gaz va neft platformalarini qaytarib oldi.

Zaporijjya oblasti aholisi evakuatsiyasi

Politsiyachi front chizig‘idan bir necha kilometr masofada joylashgan Stepnogorsk posyolkasidan evakuatsiya vaqtida 10 yoshli Dmitroga himoya nimchasi kiydirmoqda. Ushbu posyolkada elektr, gaz va suv yo‘q, u muntazam ravishda Rossiya tomonidan o‘qqa tutiladi

Ruminiya va Ukraina chegarasida bombapanagoh qurilishi

Ukrainaning Izmayil shahri yaqinidagi Ruminiyaning Plauru qishlog‘idan ikki yarim kilometr masofada joylashgan hududda 9 sentabr kuni dron parchalari topildi — bu RF armiyasi tomonidan qo‘llanadigan dronlarga mansub parchalar bo‘lib chiqdi. Bu Ruminiyada bir hafta ichida ikkinchi bor shunday hol kuzatilishi bo‘ldi: 4 sentabr kuni ham mamlakat hududiga rossiyaliklar droni qoldiqlari tushgandi. Rossiya tomoni vaziyat yuzasidan izoh bermagan. Buxarestdagilar rumin harbiylari jangovar shaylik holatida turishini ma’lum qilgan, Ruminiya-Ukraina chegarasida esa bombapanagohlar qurishga kirishilgan.